Policia ka vënë në pranga një 34-vjeçar, pasi dyshohet se është përgjegjës për disa grabitje të kryera në teqetë e fshatrave në Kolonjë.
Uniformat blu bëjnë me dije se kanë arestuar shtetasin L. U. (A)., 34 vjeç, si dhe është proceduar penalisht edhe bashkëshortja e tij.
Këta shtetas, në bashkëpunim me njëri-tjetrin, dyshohet se kanë vjedhur në objektet e kultit në fshatrat Starje, Kreshovë dhe Gjonç rreth 35 000 lekë.
“Specialistët për Hetimin e Krimeve të Komisariatit të Policisë Kolonjë, në vijim të punës për dokumentimin e plotë të rasteve të vjedhjes në objektet e kultit në disa fshatra të Kolonjës, kanë bërë të mundur zbardhjen e rasteve të ndodhura 2 muajt e fundit.
Si rezultat i punës hetimore u bë identifikimi dhe ndalimi i shtetasit L. U. (A)., 34 vjeç, banues në Belsh, Elbasan, si dhe dhe referuan materialet në Prokurori ku filloi procedimi në gjendje të lirë për bashkëshorten e tij, shtetasen S. U., 22 vjeçe, banuese në fshatin Dishnicë, Korçë.
Këta shtetas, në bashkëpunim me njëri-tjetrin, dyshohet se kanë vjedhur në objektet e kultit (teqe), në fshatrat Starje, Kreshovë dhe Gjonç, 35 000 lekë. Në cilësinë e provës materiale u sekuestrua një automjet tip “Volkswagen Passat”, të cilin dyshohet se e kanë përdorur për të kryer vjedhjet.
Vijon puna për dokumentimin e plotë të veprimtarive të paligjshme, në të cilat dyshohet se janë të implikuar këta dy shtetas”, njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
