Të martën Google pritet që të prezantojë dy telefona të rinj, për të cilët pak ka mbetur pa u mësuar nga të interesuarit dhe publiku.
Një kompani britanike publikoi gabimisht dhe më pas e fshiu menjëherë, lajmin që njoftonte furnizimin e ri me dy telefona të rinj nga Google.
Bëhet fjalë për dy modele të quajtur Pixel. Pixel i thjeshtë do të jetë 5 polësh, ndërsa Pixel XL, 5.5 polësh.
Nëpër forumet teknologjike dhe rrjetet sociale kjo është interpretuar si heqje dorë e Google nga brandi Nexus, tek i cili ka investuar prej vitesh tashmë. Në vend të tyre, nga nesër do të jetë Pixel.
Por cilat janë avantazhet e këtyre pajisjeve? “9to5Google”, forum i njohur për informacionet që nxjerr në lidhje me kompaninë amerikane, thotë se Pixel do të ketë versionin e fundit të sistemit të operimit Android, njohje dhe zhbllokim përmes gjurmës së gishtërinjve dhe kamera më cilësore se Nexus.
I njëjti forum shkruan se avantazhet më të mëdha për përdoruesit lidhen me shërbimet që do të ofrohen përmes kësaj pajisje. Përmes kësaj do të ofrohet hapësirë e pakufizuar për të ruajtur foto dhe video, që nuk do të ruhen në memorien fizike të telefonit, por në shërbimet virtuale që ofron Google.
