Pas publikimit nga mediat greke se dy gomone të ngarkuara me drogë të nisura nga shqipëria kanë tentuar të futen në territorin turk, ka reaguar Policia e Shtetit.
Në reagimin e saj, policia sqaron se lajmi është i pavërtetë ndërsa thekson se nuk ka asnjë të dhënë që mjetet lundruese të jenë nisur nga Shqipëria. Sipas policisë në gomonen e kapur nga policia greke nuk është gjetur drogë, ndërsa janë ndaluar dy shqiptarë dhe një italian.
“Në lidhje me një lajm të bërë publik në disa media, të cilat i janë referuar burimeve mediatike greke se dyshohet që dy gomone janë nisur nga Shqipëria dhe se Policia Greke është duke zhvilluar operacion, sqarojmë opinionin publik se:
Nga komunikimi paraprak me homologët grekë, lajmi i dhënë në media është tërësisht i pavërtetë. Operacioni zhvillohet në kufirin mes Turqisë dhe Greqisë dhe jo në kufirin mes Greqisë dhe Shqipërisë dhe nga komunikimi i deritanishëm dhe shkëmbimi i informacionit nuk ka asnjë të dhënë që mjetet lundruese të jenë nisur nga Shqipëria. Policia Greke gjatë operacionit ka kapur një prej mjeteve lundruese, brenda të cilit nuk është gjetur lëndë narkotike dhe ka ndaluar dy shtetas shqiptarë dhe një shtetas italian që ndodheshin në bordin e skafit. Policia e Shtetit vijon shkëmbimin e informacionit me homologët për dy shtetasit shqiptarë dhe është në ndjekje të operacionit nga homologët grekë”, deklaron Policia.
Më heret u tha se autoritetet greke ndaluan një gomone e nisur nga Shqipëria, ndërsa janë në ndjekje të gomones tjetër të ngarkuar më lëndë narkotike. Në gomonen e ndaluar ndodheshin dy shqiptarë dhe një shtetas italian, të cilët janë arrestuar dhe po merren në pyetje.
Po ashtu, u bë me dije se policia turke ka bllokuar futjen e gomones në ujërat e tyre. Pas masave të policisë turke gomonia është rikthyer në ujerat greke dhe ka tentuar ardhjen përsëri në Shqipëri. Snajperistët nga helikopteri kanë qëlluar disa herë por gomonia vazhdon të lundrojë. Operacioni po ndodh në Mitilini, ku janë angazhuar 10 skafe të policisë greke, 1 avion i FRONTEX dhe 1 helikopter i policisë greke.
Aktualisht operacioni është ende në zhvillim dhe ende nuk është e qartë se kush janë shtetasit e përfshirë në trafikimin e lëndëve narkotike, apo që po drejtojnë gomonet në vijën kufitare mes Greqisë dheTurqisë./ Opinion.al E.Xh.
