Presidenti i SHBA Joe Biden njoftoi të premten se SHBA, së bashku me G7, do të bëjnë thirrje për revokimin e statusit të “kombit më të favorizuar” për Rusinë.
“Secili nga vendet tona do të ndërmarrë hapa për t’i mohuar Rusisë statusin e ‘kombit më të favorizuar’. Përcaktimi i statusit të kombit më të favorizuar do të thotë se dy vende kanë rënë dakord të tregtojnë me njëri-tjetrin nën kushtet më të mira të mundshme – tarifa të ulëta, pak barriera për tregtinë dhe importet më të larta të mundshme të lejuara”, tha Biden.
Presidenti i SHBA shpjegoi se çfarë do të thotë kjo masë: “Në Shtetet e Bashkuara, ne i quajmë këto marrëdhënie normale tregtare të përhershme. Kjo masë do ta bëjë më të vështirë për Rusinë të bëjë biznes me Shtetet e Bashkuara dhe me kombet e tjera që përbëjnë gjysmën e ekonomisë globale. Kjo do të jetë një tjetër goditje dërrmuese për ekonominë ruse që tashmë po vuan shumë keq nga sanksionet tona”.
Lëvizja ishte një nga veprimet e reja të shumta mbi tregtinë që pritet të bëhet nga administrata Biden ndaj Rusisë. Shtetet e Bashkuara do të ndalojnë gjithashtu importet e alkoolit dhe ushqimeve të detit, si vodka dhe havjar, nga Rusia, tha një zyrtar i Shtëpisë së Bardhë për CNN.
Çdo vend pritet ta zbatojë këtë masë bazuar në proceset e veta kombëtare. Burime për CCN vunë në dukje përpjekjet e Kongresit për të anuluar marrëdhëniet e përhershme normale tregtare të Rusisë me SHBA. Kongresi pritet të prezantojë legjislacionin pas njoftimit të Biden.
