Policia ka bërë të mundur zbardhjen e plotë të konfliktit të ndodhur ditën e djeshme në Selenicë, duke arrestuar një person dhe duke proceduar në gjendje të lirë gjashtë të tjerë.
Ngjarja ndodhi ditën e djeshme në fshatin Kotë, në Selenicë, ku A. N., i punësuar si rojë në një firmë të përpunimit të inerteve, ka goditur me automjet për motive të dobëta një person, i cili ndodhet jashtë rrezikut për jetën.
Pas kontrollit të ushtruar ndaj 38-vjeçarit A. N., policia gjeti edhe një thikë, e cila u sekuestrua në cilësinë e provës materiale si armë e ftohtë.
Në këto kushte, policia arrestoi në flagrancë personin në fjalë për veprat penale “Plagosja e lehtë me dashje” dhe ” Mbajtja pa leje e armëve të ftohta”.
Policia ka proceduar në gjendje të lirë dhe gjashtë persona, nga të cilët katër kanë kanosur me fjalë përfaqësuesit e firmës së përpunimit të inerteve. Ndërsa dy të tjerë, përkatësisht pronari i firmës dhe tekniku sepse kanë njoftuar se janë dhunuar fizikisht, fakt i cili nuk ka rezultuar të jetë i vërtetë./Opinion.al
