Policia ka arrestuar një 22-vjeçar i cili ka goditur me shishe qelqi, xhamin e autobusit në të cilin udhëtonte ekipi i futbollit KF Pogradeci
Shtetasi me iniciale Xh. Zh., 22 vjeç, banues në Elbasan është arrestuar nga autoritet për veprën penale “Shkatërrimi i pronës” dhe “Goditja e sportistit”.
22-vjeçari ka goditur xhamin e autobusit pasi kishte mbaruar ndeshja.
“Specialistët për Hetimin e Krimeve të Komisariatit të Policisë Librazhd, menjëherë pas njoftimit të marrë se pas përfundimit të ndeshjes së futbollit të zhvilluar ditën e djeshme, në stadiumin Elbasan Arena, ndërmjet skuadrave KF Pogradeci dhe KF Elbasanit, në aksin rrugor “Elbasan-Librazhd”, në afërsi të Librazhdit, një shtetas kishte goditur me send të fortë (shishe qelqi), xhamin e autobusit në të cilin udhëtonte ekipi i futbollit KF Pogradeci, kanë organizuar punën me qëllim kapjen e tij.
Falë veprimeve të shpejta operacionale, u bë e mundur kapja dhe arrestimi i shtetasit Xh. Zh., 22 vjeç, banues në Elbasan, për veprën penale “Shkatërrimi i pronës” dhe “Goditja e sportistit, trajnerit, arbitrit, ndërmjetësit sportiv”.
22-vjeçari, teksa lëvizte me automjet, ka goditur me send të fortë (shishe qelqi), xhamin e autobusit në të cilin udhëtonte ekipi KF Pogradeci, pas zhvillimit të ndeshjes së futbollit, ditën e djeshme, në stadiumin Elbasan Arena.
Nga goditja, nuk është dëmtuar asnjë nga futbollistët që ndodheshin në autobus.
Materialet procedurale i kaluan Prokurorisë pranë Gjykatës së Shkallës së parë Elbasan, për veprime të mëtejshme”, shkruhet në njoftimin e policisë.
