Tension te Bayern pas humbjes katastrofike me Manchester City. Sikur të mos mjaftonte vetëm rezultati 3-0 në ndeshjen e parë, që praktikisht i lë fare pak shanse gjermanëve për përmbysje, situata në skuadër nuk është aspak e mirë.
Largimi i papritur i trajnerit Nagelsmann ishte vetëm treguesi që diçka në dhomat e zhveshjes nuk shkon. Për ta konfirmuar këtë shërbeu edhe sherri ndërmjet Sadio Mane dhe Leroy Sane pas ndeshjes në Eitihad Stadium.
Pas debatit në fushën e lojës, për një pasim të gabuar të Sane, debatet kanë vijuar edhe pas ndeshjes. Madje, sipas mediave gjermane, në shkëmbimin e ashpër të fjalëve, dy lojtarët përdorën edhe dhunë fizike.
Sipas rindërtimit të dinamikës së sherrit, i zemëruar pas humbjes së thellë, Sadio Mané goditi në fytyrë shokun e ekipit Leroy Sané. Për të evituar përshkallëzimin e situatës, shërbeu ndërhyrja e lojtarëve të tjerë të Bayern-it.
Numri 10 i bavarezëve doli nga dhoma i gjakosur, ndërsa dy futbollistët evituan edhe përshëndetjen me tifozët. Pasi ekipi zbarkoi në Mynih, Sané udhëtoi me autobusin e skuadrës, ndërsa Mané me një tjetër automjet. Edhe pse klubi nuk ka dalë ende me një qëndrim publik, priten masat ndëshkimore për yllin e afruar nga Liverpooli, i cili duket se do ta mbyllë shumë shpejt aventurën te Bayerni.
