Policia e Belgjikës ka goditur një bandë kriminale shqiptaro-bullgare e cila merrej me trafikimin e drogës, ndërsa në pranga ranë 11 persona. Në një sërë kontrollesh shtëpish në vende të ndryshme janë kryer nga policia.
Zëdhënësi Gilles Blondeau thotë se në fund të vitit 2021, zyra e prokurorit publik Halle-Vilvoorde hapi një dosje në bazë të komunikimeve të deshifruara të SKY ECC kundër një organizate kriminale të përfshirë në trafikun ndërkombëtar të drogës.
“Pas një hetimi të plotë të drejtuar nga hetuesit në Bruksel, policia gjyqësore federale e Halle-Vilvoorde arriti të identifikojë një bandë shqiptaro-bullgare që vepronte nga Meise. Banda përdorte automjete të pajisura me ndarje të fshehura për të transportuar drogën që vinte nga Holanda, pas ruajtjes në vende të ndryshme në Belgjikë, e në Mbretërinë e Bashkuar”.
Hetimi çoi në përgjimin e dy ngarkesave droge të premten. Disa kamionë që transportonin drogë u ndaluan në Aalst dhe Ypres. Në total, policia sekuestroi dyzet kilogramë kokainë dhe trembëdhjetë kilogramë heroinë.
Menjëherë më pas, hetuesit bastisën dymbëdhjetë adresa në Meise, Grimbergen, Diegem, Ëezembeek-Oppem, Sint-Niklaas, Evergem, Aalst, Evere, Sint-Gillis, Auderghem, Sint-Pieters-Ëoluëe dhe Schaarbeek.
U arrestuan 11 të dyshuar dhe policia gjeti dymbëdhjetë armë zjarri, si dhe 100 mijë euro para të gatshme. Policia Gjyqësore Federale sekuestroi edhe disa paleta me produkte duhani, si dhe disa kamionë gjysmërimorkio dhe disa furgona.
Njëmbëdhjetë të dyshuarit do të merren në pyetje këtë fundjavë, pas së cilës prokurori publik mund t’i dërgojë ata para gjykatësit hetues, me qëllim të arrestimit të mundshëm./Opinion.al
