Policia e Durrësit ka vënë në pranga 8 persona, të dyshuar si pjesëtarë të 2 grupeve kriminale që shpërndanin lëndë narkotike.
Uniformat blu bëjnë me dije se pas një hetimi 6-mujor, gjatë 2 operacioneve antidrogë, kanë goditur 2 grupe kriminale, që shpërndanin lëndë narkotike në qytetin e Durrësit.
Sipas informacioneve zyrtare janë arrestuar 8 shtetas, disa prej tyre të dënuar më parë.
Nga hetimet e kryera ka rezultuar se këta shtetas në bashkëpunim me njëri-tjetrin, e shpërndanin drogën në zonën e Sukthit dhe të Durrësit, si dhe në lokalet e natës, në qytetin e Durrësit.Gjithashtu, për ndarjen e lëndës narkotike, kishin përshtatur ambiente të posaçme në lokalet e tyre.
Si rezultat i këtyre operacioneve janë sekuestruan në cilësinë e provës materiale disa pako me lëndë narkotike të llojit kokainë, 3 automjete, shuma parash, 14 aparate celulare, 1 dorezë hekuri si dhe 3 peshore elektronike që shërbenin për peshimin dhe ndarjen e lëndës narkotike në doza të vogla.
“-Në kuadër të operacionit policor të koduar “Last Deal” u arrestuan shtetasit:
-G. M. (alias G. L., G. M., G. F.), 48 vjeç, i dënuar më parë;
-T. M., 43 vjeç, banues në Sukth, i dënuar më parë;
-A. H., 24 vjeç dhe A. V., 17 vjeç, të katërt banues në Sukth.
-Në kuadër të operacionit “Foremost” u arrestuan shtetasit:
-E. C., 25 vjeç, G. K., 23 vjeç dhe K. B., 24 vjeçe, të tre banues në Durrës, si dhe S. B., 24 vjeç, banues në Shijak.
Nga hetimet me metoda proaktive ka rezultuar se shtetasi G. M. kishte rolin e furnitorit me lëndë narkotike kokainë, për këta shtetas, të cilët, pasi e blinin atë, në bashkëpunim me njëri-tjetrin, e shpërndanin në zonën e Sukthit dhe të Durrësit, si dhe në lokalet e natës, në qytetin e Durrësit.Gjithashtu, këta shtetas, për ndarjen e lëndës narkotike, kishin përshtatur ambiente të posaçme në lokalet e tyre, konkretisht në lokalin e shtetasit G. M., në zonën e Sukthit, dhe në lokalin e shtetastit E. C., në një lagje në Durrës.
Si rezultat i këtyre operacioneve u sekuestruan në cilësinë e provës materiale:
– 1 pako me kokainë, me peshë 130 gramë;
– 40 doza me lëndë narkotike të llojit kokainë;
– 3 automjete, 2 prej tyre luksoze;
– 96 mijë lekë të rinj dhe disa shuma në euro, franga dhe paund;
-3 peshore elektronike që shërbenin për peshimin dhe ndarjen e lëndës narkotike në doza të vogla, 1 dorezë hekuri dhe 14 aparate celulare”, tha policia.
Materialet hetimore do t’i referohen Prokurorisë pranë Gjykatës së Shkallës së Parë Durrës, për veprat penale “Përshtatja e lokalit për përdorim droge”, “Prodhimi dhe shitja e narkotikëve”, kryer në bashkëpunim, dhe “Prodhimi, mbajtja, blerja apo shitja e armëve të ftohta”.
