Kryeprokurori Adratik Llalla përsëriti sot kërkesën për largimin e dy kryebashkiakëve të PS, në Poliçan dhe Tepelenë. Por reagimi i Tërmet Peçit të Tepelenës është breslënës.
Ai është pyetur nga gazetarët pas deklaratës së Lallës dhe ka thënë se “nuk kam bërë burg vetëm kick box kur kam qenë i vogël”.
“Ç’punë kam unë të jap shenjat e gishtave. Ata pisat e PD akuzojnë kot. Unë jam rrahur kur kam qenë i vogël se jam marrë me kick-box, po nuk jam unë për të rrahur”, u shpreh ai. Kjo nuk është hera e parë që Termeti lëshon termete. Ai do të mbahet mend edhe për gafën gjatë fushatës elektorale të 2015 kur u shpreh live në TV se fitorja e PS do të jetë publiçitare… (shihni videon më poshtë)
Lalla për largimin e Zotkajt dhe Peçit
Nga Gjirokastra, Kryeprokurori Llalla deklaroi i ka kërkuar KQZ-së, heqjen e mandatit për kryebashkiakët e Tepelenës dhe të Policanit.
“I kemi kërkuar KQZ-së t’i hiqet mandati dy kryebashkiakëve, kreut të bashkisë së Poliçanit, Artur Zotkaj dhe atij të Tepelenës, Tërmet Peçit. Ka nisur një procedim për falsifikim dokumentash. Dekriminalizimi duhet të zbatohet para zgjedhjeve”, tha Llalla.
