Djali i madh i çiftit Saliaj, i cili fatkeqësisht ishte pranë lokalit ditën e vrasjes së babait të tij Kudret Saliajt nga gjyshi, pasi duhej të dëshmonte në gjykatë se me cilin nga prindërit dëshironte të qëndronte ka deklaruar se nëna e tij ushtronte dhunë ndaj tij dhe motrës e vëllait më të vegjël. Po ashtu ai ka folur për marrëdhënie të tensionuara me gjyshin dhe dajën.
“Djali i madh do të deklaronte atë ditë para gjykatës së me cilin nga prindërit do të qëndronte. Nuk ka qenë i pranishëm në vendin e ngjarjes, është gjendur në një lokal pranë atij ku ka ndodhur ngjarja me një kushëri të viktimës. Ai është afruar pas ngjarjes, por nuk e ka lejuar policia. 16-vjeçari ka deklaruar se nëna e tij ushtronte dhunë ndaj tij dhe motrës e vëllait më të vegjël. Ka folur për marrëdhënie të tensionuara me gjyshin dhe dajën e tij. Por ai do të ripyetet nga oficerët e Policisë Gjyqësore dhe konfliktet në familje mes prindërve të tij që nga 2013 dhe që kishin kulmuar në 2020”, ka deklaruar gazetarja Klodiana Lala në news 24.
Ndërkohë detaje të reja janë zbuluar në lidhje me vrasjen e Kudret Saliajt nga ish-vjehrri i tij Mexhit Picari në afërsi të Gjykatës së Tiranës. Bëhet me dije se autori i ngjarjes, Mexhit Picari dhe e bija, Dhurata Saliaj, kanë vëzhguar për rreth 30 minuta para vrasjes të gjitha lëvizjet e Saliajt, dhe kanë bashkëpunuar së bashku. Po ashtu, babë e bijë kanë bërë deklarata kontradiktore para hetuesve, duke mos qenë koherent në deklarime. Picari ka deklaruar që në lokal ka qenë i ulur në një prej tavolinave i vetëm, përkundër deklarimeve të Dhuratës, e cila ka thënë se ka qenë me të atin në tavolinë.
Ditën e nesërme, pritet të dalin para gjykatës së Tiranës Mexhit Picari dhe vajza e tij, Dhurata Saliaj për vrasjen e ish bashkëshortit të saj Kudret Saliaj. Prokuroria e Tiranës ka dorëzuar në gjykatë kërkesën për masën e sigurisë “arrest me burg” për Picarin dhe Saliajn./Opinion.al
