Gjyqtarja Mimoza Margjeka, e cila ndodhet nën masën e sigurisë “arrest shtëpie”, pasi akuzohet se është pjesë e një skeme korrupsioni ka kërkuar leje nga SPAK për të vizituar vajzën e saj.
Në kërkesën e saj drejtuar prokurores Enkelejda Millonai, Margjeka shkruan se gjatë kohës që ndodhet në arrest shtëpie, vajza e saj tre vjeçare ka patur një hemorragji në hundë. mjeku i lagjes ka udhëzuar që fëmijë të vizitohet pranë specialistit përkatës.
Gjyqtarja me këtë rast ka kërkuar leje për të shoqëruar vajzën se saj tek mjeku pasi siç shkruan ajo “nuk kam njerëz të tjerë familjare apo të afërm të më ndihmojë” duke qenë se burri i saj ndodhet në paraburgim.
“Gjatë kohës që ndodhem në masë arrest shtëpie vajza jonë tre vjeçare ka manifestuar një gjendje hemorragjie, gjak nga hundët, ngjarje e ndodhur në datën 15.09.2020. Kam njoftuar mjekun e lagjes, i cili nëpërmjet rekomandimit me shkrim ka udhëzuar për vizitë klinike pranë specialistit përkatës. Në kushtet që ndodhen në arrest shtëpie e kam të pamundur të asistoj vizitat dhe mjekimin e vajzës për shkak se edhe bashkëshorti siç edhe jeni në dijeni ndodhet në paraburgim me vendim gjykatë dhe nuk kam njerëz të tjerë familjare apo të afërm të më ndihmojë. Ju lutem më mundësoni nëpërmjet ndonjë akti shkresor të lëshuar nga ju, miratimin e shoqërimit të vajzës në kryerjen e vizitave mjekësore”, thuhet në shkresë.
Në përgjigje, Prokuroria e Posaçme ka vendosur të mos e miratojë lejen e gjyqtares.
Gjyqtarja Mimoza Margjeka dyshohet se nëpërmjet burrit të saj, Arben Cara, ka marrë 6 mijë euro për të lehtësuar masën e sigurisë të një arrestuari duke e lënë të lirë. /Opinion.al
