Fuat Vjerdha ka reaguar në lidhje me shkarkimin nga detyra nga Komisioni i Pavarur i Kualifikimit. Gjyqtari që votoi kundër shkurtimit të dënimit të Dritan Dajtit u shkarkua nga KPK dy ditë më parë për arsye profesionale.
Përmes një postimi në Facebook, gjyqtari e ka cilësuar shkarkimin e tij si pjesë të luftës së klasave të kohërave moderne që po bëhet edhe me anë të vettingut.
Vjerdha thekson se nga salla e vettingut ka dalë ‘kryenaltë’ sepse nuk ka rezultuar të jetë as i korruptuar as me lidhje me grupet kriminale.
Në fund, Vjerdha e mbyll reagimin e tij duke ju drejtuar zotit me fjalët “Fali zot se nuk dijnë ç’a bajñë!”.
Vendimi për shkarkimin e tij u shpall nga trupa gjykuese e drejtuar nga Olsi Komici, me relator Lulzim Hamitaj dhe anëtare Pamela Qirko.
Ish Kryetari i Gjykatës së Apelit të Shkodrës u përball dy herë në seancë dëgjimore me Komisionin e Pavarur të Kualifikimit. Gjatë vlerësimit të pasurisë, KPK konstatoi probleme të vogla me deklarimin e pasurisë dhe mungesë burimesh të ligjshme prej 1.6 milionë lekësh.
Hetimeve për kriterin profesional e rënduan pozitën e Vjerdhës, pasi KPK mori në shqyrtim lehtësimin e akuzave për Sokol Mjacajn në vitin 2010 dhe dy denoncime nga publiku.
Vjerdha e mbrojti procesin në Apel ndaj Mjacajt. Ai ngulmoi se Sokol Mjacaj nuk kishte qenë bashkëpunëtor në një vrasje të vitit 2010, ndërsa shtoi se për vrasjen e dy turistëve çekë ai u dënua me burgim të përjetshëm nga një trupë gjykuese ku pjesë kishte qenë edhe vetë.
“Nuk kemi shkelje proceduriale. Kjo çështje është gjykuar edhe në Gjykatën e Lartë”, tha ai në seancën dëgjimore të 7 qershorit.
Gjyqtari Fuat Vjerdha është një nga gjyqtarët e Dritan Dajtit, për të cilin ai votoi kundër zbritjes së dënimit të tij. Bashkë me Lindita Hoxhën, ai vendosi kundër gjykimit të shkurtuar, ndërkohë që tre të tjerë, Petrit Aliaj, Aleks Nikolla dhe Skënder Damini vendosën të zbresin dënimin e përjetshëm për Dajtin, duke lënë në fuqi dënimin me 25 vjet burgim.
Reagimi i Fuat Vjerdhës
“Të dashur miq! Ju falënderoj nga zemra për mbështetjen qe po më jepni me mesazhet tuaja dhe keqardhjen qe shprehni për shkarkimin tim nga detyra fisnike e gjyqtarit, të cilën e ushtrova për 25 vite. Kjo situatë më kthej në vitin 1973, kur mua, që kisha mbaruar maturën me mesatare 10, nuk mu dha e drejta e studimit nga komunistet ne pushtet, ne kuadër të zhvillimit të luftës së klasave. Edhe atëherë, si sot, keqardhja shprehej nga të djathte e të majtë qe më njihnin. E përsëris se nga salla e vettingut kam dalur kryenaltë, sepse u provua që nuk kam qenë dhe nuk jam i korruptuar, nuk kam lidhje me grupet kriminale, nuk kam asnjë pasuri të paluajtshme, të krijuar nga unë, përveç atyre te trashëguara nga e ndjera nëna ime, bijë e familjes Tafilica, e respektuar në Shkodër. Gjithçka tjetër është shprehje e formave moderne të vazhdimit të luftës së klasave, që po zhvillohet ndaj asaj pjese të shoqërisë sonë, e persekutuar gjatë monizmit, që unë kam përfaqësuar në gjyqësorin shqiptar. Mos ndjeni keqardhje për mua, por për ata që përgatiten dhe dhanë vendimet e datës 10.06.2019, kundrejt meje dhe një zonje tjetër shkodrane, kryetares së Gjykatës së Tiranës. Fali zot se nuk dijnë ç’a bajñë!” /Opinion.al
