Gjyqtari i dosjes “Gërdeci”, Shkëlzen Selimi ka udhëtuar jashtë vendit me makinat e Delijorgjit e Minxollit. Kështu raporton televizioni Top Channel, i cili publikoi sot udhëtimet e gjyqtarit, të regjistruara në sistemin “TIMS”.
“Sistemi “TIMS” tregon se janë 13 udhëtime të Shkëlzen Selimit, në të cilat ai përdor automjetin “Mini Couper” me targa AA 653 GM. Makina është e regjistruar në emër të kompanisë “Park Construction”, e cila njihet në Tiranë për ndërtimin e një kompleksi pallatesh tek ish-Parku i Autobusëve, e që ka për administratore Vjollca Delijorgjin. Ajo është bashkëshortja e Mihal Delijorgjit, i akuzuari kryesor për ngjarjen e Gërdecit, për të cilin Shkëlzen Selimi nuk e kaloi gjykimin në seancë të hapur, por e mbylli duke e shpëtuar nga një penalizim edhe më i rëndë”, raporton TCH.
“Udhëtimet e gjyqtarit me automjetin e bashkëshortes së Delijorgjit janë të regjistruara në pikat kufitare Muriqan dhe Qafë Thanë, i pari në dhjetor të vitit 2013, pak muaj pasi dha vendimin për Gërdecin. Më pas, me këtë makinë, Selimi ka kaluar më 7 shkurt të vitit 2014, e duket se ka kaluar një fundjavë në Maqedoni. Sërish më 31 maj të vitit 2014, më 18 tetor të atij viti, e më pas në maj të vitit 2015.
Në vitin 2016, makina e Delijorgjëve me Shkëlzen Selimin në bord del nga Murriqani disa herë e në fund nga Kapshtica. Udhëtimi i fundit me këtë mjet është më 30 shtator të vitit 2016. Më pas, çifti Selimi ka ndryshuar automjet.
Po kështu, në datën 8 maj 2015, gjyqtari i Gjykatës së Lartë ka dalë në pikën e Kakavijës me makinën tip “Volksëagen” me targa AA 399 KF. Ky mjet është në pronësi të të akuzuarit tjetër të Gërdecit, Dritan Minxolli, që deri më 15 mars 2008 ishte administrator i fabrikës së demontimit në Gërdec”, shkruan më tej Top Channel që hedh dyshime për konflikt interesi të gjyqtarit me personat që kanë qenë të akuzuar për dosjen “Gerdeci”.
