TIRANË- Gjyqtari Artan Gjermeni i cili u paraqit i plagosur në spital po hetohet edhe për përfitim të paligjshëm të valutës që iu gjet në makinë. Burimet thanë se ka dyshime se 20 mijë eurot mund të jenë përfituar përmes rryshfetit. Këto janë vetëm dyshime, pasi ende nuk ka prova që e vertetojnë këtë.
Gjyqtari i Gjykatës së shkallës së Parë në Tiranë, Artan Gjermeni u plagos mbrëmjen e së dielës pranë banesës së tij, tek rruga e Elbasanit. Ai pretendon se është prerë me llamarinë në garazhin e makinës, por policia dyshon se mund të jetë plagosur me thikë, mbase pas një konflikti të momentin në garazh. Ai vetë nuk ka pranuar që të hetohet ngjarja, duke e konsideruar aksidentale.
Gjatë kontrollit që u ushtrua në makinën e tij, tip “Smart” u gjetën dhe u sekuestruan nga policia, të fshehura në korskot, plot 20 mijë euro.
Ndërkohë pritet të vendoset sot nëse hetimet do të vijojnë nga Prokuroria e Tiranës, apo nëse do të kalojë në Prokurorinë e Krimeve të rënda për “plagosje për shkak të detyrës”.
