Në Gjykatën Speciale ka nisur sot procesi gjyqësor ndaj ish-krerëve të Ushtrisë Çlirimtare të Kosovës.
Në nisje të seancës Prokuroria lexoi edhe një herë paragrafët e aktakuzës së ndryshuar ndërsa janë pyetur ish-krerët e UÇK nëse e kuptojnë atë.
I pari u pyet ish-presidenti Hashim Thaçi. “E kuptoj aktakuzën, jam plotësisht i pafajshëm”, kështu ka deklaruar ish-presidenti dhe ish-kryeministri i Kosovës Hashim Thaçi teksa u pyet nga gjykatësja.
Më pas ish-kreu i Kuvendit Kadri Veseli shprehi pakënaqësinë e tij me vonësen 1 veçare e gjysmë të procesit. “Veseli, e kuptoj, shpreh pakenaqësinë time për një vonesë 1 vjeçare e gjysmë”, deklaroi në pyetjen e bërë se a e kupton aktakuzën e ndryshuar.
“Jam i pafajshëm në të gjitha pikat e aktakuzë”, u shpreh edhe Rexhep Selimi.
Më pas, Jakup Krasniqi tha se nuk ka lidhje me asnjë nga pikat e aktakuzës që i lexoi prokurorja. “E kam vështirë ta kuptojë aktakuzën dhe mënyrën si është përpiluar, nuk kam asnjë lidhje me asnjërën nga akuzat që i lexoi prokurorja para pak kohësh”, tha ai.
“E kuptoj ashtu siç është por nuk pajtohem me të pasi nuk mbaj asnjë përgjegjësi për atë që flet aktakuza. Plotësisht i pafajshëm”, u deklarua Krasniqi.
Në senacën e sotme Prokurori i specializuar fillimisht do të mbajë deklaratën e tij. Gjyqtarët i kanë caktuar atij një afat prej pesë orësh për të përmbledhur rastin që synon ta paraqesë.
Pas kësaj, është mbrojtësi i viktimave që do të bëjë deklaratën hyrëse, e cila pritet të zgjasë deri në 45 minuta.
Në ditët në vijim do të mbahen edhe fjalimet e avokatëve mbrojtës të ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi./Opinion.al
