Ish-zëdhënësi i Ushtrisë Çlirimtare të Kosovës, Jakup Krasniqi, është parë në gjendje jo të mirë shëndetësore në seancën gjyqësore në Hagë gjatë ditës së sotme.
Avokatja e tij, Venkateswari Alagendra, ka thënë se klienti i saj nuk ndihet mirë për momentin dhe se i duhet të largohet nga salla e gjyqit.
“Z.Krasniqi nuk ndjehet shumë mirë për momentin. Mendoj se mund të qëndrojë edhe pak, por do të na thotë nëse mund të qëndroj dhe nëse kërkon të largohet, shpresoj të na lejohet”, ka deklaruar avokatja e Jakup Krasniqit.
Ndërkohë gjyqi ka vazhduar me marrjen në pyetje të dëshmitares së mbrojtur, seanca e cila ka vijuar të mbahet e mbyllur për publikun, kjo me qëllim të mos zbulimit të identitetit të tyre.
Kujtojmë se ish-krerët e UÇK, Hashim Thaçi, Kadri Veseli, Jakup Krasniqi dhe Rexhep Selimi po akuzohen për krime lufte dhe kundër njerëzimit, ku përfshihen përndjekje, burgim, akte të tjera çnjerëzore, torturë, vrasje e paligjshme dhe zhdukje me forcë e personave.
