Në procesin gjyqësor kundër depuetit Armando Prenga në Gjykatën e Lartë kanë dëshmuar katër policë të komisariatit të Kurbinit. Gjon Kola, Lutfi Hima,Agim Vafaj dhe Ylli Vata, natën e 4 shtatorit kanë qenë me shërbim ku pjesëtarët e fisit Cali u përplasën me ata të fisit Prenga, në oborrin e komisariatit. Të katër efektivët sqaruan para togave të zeza se sherri ka ndodhur jashtë komisariatit.
Aty ishin grumbulluar mbi 20 persona dhe sipas tyre ka patur të shtëna me pistoletë gjithësej 6 herë, si dhe një breshëri kallshnikovi. Të pyetur nga gjykata dhe prokuroria nëse kanë parë personat që qëlluan me armë ata u shprehën se nuk kanë mundur të identifikojnë për shkak të errësirës.
Ndërsa sqaruan se kamerat e sigurisë së komisaritit nuk punonin natën e ngjarjes. Në 4 shtator përpara komisaritit të Kurbinit pati një përleshje mes Calëve dhe Prengëve, për shfrytëzimin e lagunës së Patokut. Sipas prokurorisë deputeti Prenga në këtë ngjarje ka plagosur dy persona me një armë të cilën e mbante pa leje. /Tv Klan
