Gjykata e Posaçme zhvilloi sot seancën ndaj ish-kryebashkiakut të Lushnjes Fatos Tushe dhe 21 të pandehurve të tjerë të cilët janë në sallë, të arrestuar për shpërdorim detyre dhe shkelje të barazisë në tendera.
Ish-kryebashkiaku Tushe dhe 19 të pandehurit e tjerë kanë kërkuar gjykim të shkurtuar së bashku me ish-nënkryetarin Gentian Tushe, kërkesë e cila është pranuar nga GJKKO.
Çështja është veçuar vetëm për dy të pandehurit Bujar Murati dhe Natasha Myrtaj.
Tushe sëbashku me zyrtarë të tjerë të Bashkisë së Lushnjes u arrestuan më 6 korrik me urdhër të SPAK nën akuzën e shpërdorimit të detyrës dhe përfshirjes në një tender abuziv.
Ata akuzohen se abuzuan me tenderin 24 mln lekë për kanalin vaditës në fshatrat Bishqethëm dhe Bitaj. Ky tender është fituar nga kompania EuroAlb shpk, që kishte sjellë ofertën më të lartë, por më pas punimet, fitimet dhe punën e ka bërë një kompani tjetër.
