Kandidati për kryeministër nga Lëvizja Vetëvendosja, Albin Kurti, ka thënë se vendimin e Gjykatës Supreme, i dhënë ditën e sotme, për mospërfshirjen e tij në listën e kandidatëve për deputetë nuk e kanë pranuar akoma.
Në një tubim me qytetarët në Prizren, Kurti është shprehur se pasi ta analizojnë vendimin do të shohin se cilët do të jenë hapat e tjerë që do t’i ndërmarrin, transmeton Klan Kosova.
“Unë nuk e kam parë atë vendim, kur vjen në zyrën e LVV-së e trajtojmë dhe e analizojmë. Ne do të shohin se çfarë hapa duhet t’i ndërmarrim më tutje, dhe ku do të mund të ankohemi nëse është kështu siç është duke u paralajmëruar”.
Ndërkaq nga Prizreni ai u ka kërkuar qytetarëve që të dalin të gjithë të votojnë në këto zgjedhje.
“Në këto zgjedhje duhet të dilni të gjithë të votoni. Na duhen 61 deputet e sipër. Të votoni të gjithë sikurse diaspora të cilët janë regjistruar të gjithë për të votuar. Të dielën e 14 shkurtit le ta bëjmë festë të fitores së LVV-së”, ka thënë Kurti për TV BESA./Opinion.al
