Gjykata e Apelit ka pranuar kërkesën e Izet Haxhisë për të rihapur dosjen “Hajdari”. Kërkesa e Haxhisë do të shqyrtohet në Gjykatën e Shkallës së Parë, ndërsa avokati i tij Bashkim Nikolla tha se në seancën e radhës do të paraqiten prova të reja që provojnë pafajësinë e Izet Haxhisë në lidhje me vrasjen e Azem Hajdarin. Ndër dëshmitarët që do të thërriten, sipas tij, është edhe Sali Berisha.
“Ky është një vendim shumë i drejtë. Ky vendim e rikthen çështjen në Gjykatën e Shkallës së Parë. Kemi siguruar të drejtën të dëgjohemi. Provat janë materiale, tabulante dhe dëshmitarë. Me të gjitha këto ne do të provojmë pafajësinë që i është faturuar të përfaqësuarit prej meje. Në krye të listës së dëshmitarëve që do të thirren është Sali Berisha”, u shpreh avokati.
Haxhia kishte ankimuar vendimin e Gjykatës për shkak se vendimi për dënimin me 25 vite ishte marrë në mungesë të tij./Opinion.al
