Agjentja ruse Maria Butina u dënua me 18 muaj burg nga një gjykatë në SHBA pasi ka pranuar se ka tentuar të infiltrohet në qarqet politike në SHBA, për të promovuar interesat ruse, gjatë vitit 2016 para zgjedhjeve presidenciale.
Ky vendim i gjykatës është kritikuar nga Kremlini ku zëdhënësi, Dmitry Peskov është shprehur se fakti që ajo është dënuar me një dënim të gjatë është i papranueshëm.
“Ne besojmë se shtetasja ruse nuk ka qenë dhe nuk mund të jetë e përfshirë për atë që është akuzuar”, –tha Peskov.
Maria Butina ndodhet në burg që prej korrikut të vitit 2018 dhe pritet t’i llogariten në dënim 9 muajt e qëndrimit në paraburgim.
Gjithashtu gjykata në SHBA vendosi se pasi ajo të përfundojë dënimin në janar të vitit 2020 do të deportohet në Rusi.
Gjatë gjyqit, Butina ka pranuar se ka vepruar si agjente e paregjistruar për Qeverinë ruse, në kohën që ka qenë studente në një nga universitetet në Shtetet e Bashkuara./Opinion.al/
