Gjykata e Krimeve të Rënda ka dhënë sot masën e sigurisë “arrest me burg” edhe për Kujtim Mirin, kushëririn dhe njëherësh sekserin e gjykatësit të arrestuar për korrupsion, Shkëlqim Miri.
Kujtim Miri është personi që u përgjua dhe filmua teksa në muajin maj në një lokal në Fushë Krujë mori para nga të afërm të Gentian Dodës dhe më pas ia çoi gjyqtarit.
Ndërkohë para gjykatës prokurori Klodian Braho u shpreh se hetimet për këtë rast janë të hapura dhe do të ketë të tjerë persona të proceduar.
Gjithashtu pritet që këtë javë të mblidhet Këshilli i Lartë i Drejtësisë për të vendosur masën e pezullimit nga detyra ndaj gjyqtarit Miri, deri në përfundim të procesit gjyqësor të nisur ndaj tij për korrupsion.
