Presidenti i Republikës, Ilir Meta i është drejtuar deputetëve me një mesazh lidhur me emërimet e anëtarëve të Gjykatës Kushtetuese.
Parlamenti pritet të mblidhet sot për të plotësuar dy vakanca në Gjykatën Kushtetuese.
Meta nënvizon faktin se zgjedhja e anëtarëve të Gjykatës Kushtetuese është tepër e rëndësishme edhe si një nga nëntë kushtet e Bundestagut.
Ai i bën thirrje deputetëve të gjejnë “pesë minuta kohë” për të lexuar nenin 179, pika 2 dhe 12 të Kushtetutës dhe nenin 86 pika 4/a/c të ligjit për Gjykatën Kushtetuese.
Presidenti thekson se pasi ai zgjodhi një nga anëtarët tashmë është radha e Kuvendit që të zgjedhë dhe më pas ai “do të shprehet menjëherë brenda 24 orëve për të zgjedhur anëtarin e tretë”.
Në fund të statusit Meta paralajmëron publikimin e disa “botimeve kontrabandë” në Fletoren Zyrtare si edhe “mbledhjet e pazbardhura të KED”.
Kujtojmë se zgjedhja e anëtarëve të Gjykatës Kushtetuese ka sjellë një përplasje mes Presidentit dhe Kuvendit. Meta nuk u shpreh për zgjedhjen e vakancës së dytë që ai ka të drejtë të emërojë me argumentin se sipas Kushtetutës emërimin e dytë e bën Kuvendi.
Statusi i Ilir Metës
Të nderuar deputetë,
Sot është një ditë tepër e rëndësishme për të treguar përgjegjshmëri për të ardhmen europiane të Shqipërisë!
Ju e dini që krijimi i Gjykatës Kushtetuese është një nga nëntë kushtet kryesore të Bundestagut gjerman për çeljen e negociatave me Bashkimin Europian.
Kushtetuta e ka përcaktuar qartë radhën se si kryhen emërimet për anëtarë të Gjykatës Kushtetuese!
Presidenti i Republikës e zgjodhi anëtarin e parë të saj menjëherë !
Tani është radha e Kuvendit të zgjedhë anëtarin e dytë, edhe pse me vonesë!
Presidenti po e ndjek me vëmendje këtë proces dhe do të shprehet menjëherë brenda 24 orëve për të zgjedhur anëtarin e tretë sapo Kuvendi të ketë shprehur vullnetin e tij.
Ndaj ju lutem, gjeni pesë minuta kohë, lexoni nenin 179, pika 2 dhe 12 të Kushtetutës dhe nenin 86 pika 4/a/c të ligjit për Gjykatën Kushtetuese dhe veproni pa humbur kohë!
Sa për marifetet e individëve të verbër partiakë të sistemit të drejtësisë dhe botimet kontrabandë në Fletoren Zyrtare, do t’i zbardhim për ju dhe publikun pak më vonë, bashkë me mbledhjet e pazbardhura të KED!!!
Përshëndetje nga Forumi i Paqes në Paris!/ Opinion.al
