Gjykata e Shkallës së Parë Gjirokastër ka hedhur poshtë kërkesën e Prokurorisë e cila kërkoi pushimin e hetimeve për çështjen e Konstantinos Katsifas.
Gjithashtu, Prokuroria ka kërkuar kryerjen e disa hetimeve të tjera shtesë të parashikuar nga ligji.
“Në vijim të interesimit të medias për çështjen penale për ngjarjen e datës 28.10.2018 në fshatin Bularat/Dropull, prokuroria pranë Gjykatës së Shkallës së Parë Gjirokastër ju informon se pas kërkesës së prokurorisë për pushimin e çështjes, Gjykata e Rrethit Gjyqësor Gjirokastër, si organi kompetent, ka vendosur kthimin, duke urdhëruar kryerjen e disa veprimeve të tjera hetimore sipas parashikimeve ligjore. Aktualisht çështja ndodhet në fazën e përmbushjes së këtyre detyrimeve”, thuhet në vendim.
Ndërkohë më herët, babai i Kostandin Katsifas, Jani Katsifas në një intervistë për abc news tha se nuk beson në vetëvrasjen e djalit të tij.
Jani Katsifas thekson se në vendimin e parë u dol në përfundimin se djali i tij u vra.
“Nuk e besojmë që ai është vetëvrarë në asnjë mënyrë. Keni vendimin e parë ditën e parë kur u vra. Na thanë merreni. Ne nuk e morëm. Sollëm doktor nga Janina. Ai tha do verifikohet. Edhe nuk e pranuam. E di se çfarë thonë. Na lanë një letër që thotë vetëvrasje jo. Vrasje po. Kupton? Ajo i thotë të gjitha. Na e dhanë në Gjirokastër kur vajtëm për të marrë djalin që na thonin merre menjëherë. Dhe nuk pranuam për ta marrë pa u bërë ato analizat”, u shpreh babai i Kostandin Katsifas.
Ngjarja e rëndë ndodhi tre vite më parë në fshatin Bularat të Gjirokastrës.
