Gjykata e Lartë Italiane ka marrë dje vendimin e sekuestrimit të të gjitha fondeve financiare të Partisë Lidhja, kudo qofshin, deri në vlerën e 49 milionë eurove, e cila është shuma e mashtrimit të kësaj force politike në dëm të shtetit italian.
Ky proces gjyqësor ka nisur hetimet në vitin 2012 duke zbardhur skemën e një mashtrimi fiskal, riciklim parash si dhe përvetësim të paligjshëm fondesh në dëm të shtetit e të Parlamentit italian, nga ana e Partisë Lega Nord dhe familjes së liderit të saj historik Umberto Bossi përgjatë viteve 2008-2010.
Si rrjedhojë e këtij procesi i mbyllur në korrik të 2017, ish-lideri i Lega Nord, Umberto Bosii u dënua me 2 vjet e 6 muaj heqje lirie, financieri i kësaj force politike Francesco Belsito me 4 vite e 10 muaj burg, e djali i Umberto Bossit, Renzo Bossi me 1 vit e 6 muaj burg.
Vendimi i sapo marrë nga Gjykata e Lartë italiane rrezikon të shndërrohet në një boomerang politik ndaj Ministrit të Brendshëm, Matteo Salvini, njëkohësisht zëvendës kryeministër në qeverinë Conte e lider i Partisë Lidhja.
“Ky është një proces politik ndaj Lidhjes”, ka reaguar Matteo Salvini.
“Këto para nuk i kam parë kurrë. Këto 49 milionë euro sot nuk ekzistojnë e kanë të bëjnë me fakte të 10 viteve më parë.”
Pas vendimit të marrë nga Gjykata e Lartë, Financa Italiane mund bllokojë të gjitha llogaritë e Partisë Lidhja, duke rrezikuar një paralizë ekonomike të kësaj force politike.
I menjëhershëm ka qenë dhe reagimi i kundërshtarëve politikë të Lidhjes.
Partia Demokratike ka drejtuar gishtin ndaj Lëvizjes 5 Yje e liderit të saj Luigi Di Maio duke i kujtuar se “pak kohë më parë ulërisnin “ndershmëri” ndërsa sot janë aleatë me ata që mashtrojnë italianët. “/OraNews/
