Seancat gjyqësore për rastin e ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi, të gjithë të planifikuara për javët e ardhshme, janë pezulluar. Vendimi është lëshuar nga vetë Dhomat e Specializuara në Hagë.
“Pas përfundimit të Konferencës së Statusit të sotëm, ju njoftojmë se të gjitha seancat dëgjimore të planifikuara më parë për nëntor dhe dhjetor në gjyqin Thaçi etj. janë anuluar dhe hequr nga Kalendari i Gjykatës. Siç u përmend gjatë Konferencës së Statusit, Trupi Gjykues synon të nxjerrë një vendim mbi hapat e mëtejshëm në procedura më vonë këtë javë”, thuhet në njoftim.
Deri më tani në Hagë janë dëgjuar dëshmitë e disa diplomatëve amerikanë apo zyrtarëve të angazhuar për arritjen e armëpushimit në luftën mes Kosovës dhe Serbisë si James Rubin, Cristopher Hill dhe së fundmi ish gjenerali i NATO-s, Wesley Clark.
Hashim Thaçi, Kadri Veseli, Jakup Krasniqi dhe Rexhep Selimi për 5 vite mbahen të izoluar në dhomat e paraburgimit në Hagë të akuzuar për krime lufte e krime kundër njerëzimit.
