Lirohet pas gati 10 muajsh në qeli ish-deputeti i Partisë Demokratike, Ervin Salianji.
Vendimi u mor paraditen e kësaj të marte, 8 korrik, nga Gjykata e Fierit, ku u mbajt seanca për shqyrtimin e kërkesës së tij për liri me kusht.
Sipas tvklan mësohet nga seanca se raporti i shërbimit të provës ishte pozitiv dhe po ashtu edhe prokurori i çështjes, Genc Mane dha dakordësinë e tij për lirimin e Salianjit.
Kjo ishte e disata tentativë që ish-deputeti Ervin Salianji bën për t’u liruar nga burgu, që pas arrestimit të tij më 27 shtator të vitit 2024. Në mars të këtij viti, Gjykata e Lartë i rrëzoi rekursin, i cili kërkonte rrëzimin e vendimit të 27 shtatorit dhe fitimin e lirisë.
Kujtojmë se Salianji u dënua nga Gjykata e Tiranës për kallëzim të rremë në lidhje me një denoncim publik që kishte bërë ndaj vëllait të ish-ministrit të Brendshëm socialist, Fatmir Xhafaj. Bëhet fjalë për rastin që u njoh publikisht si “Babalja”, ku pretendohej se vëllai i Xhafajt ishte i përfshirë në trafikun e drogës.
Nga hetimet rezultoi se e gjitha ishte një material i montuar dhe biseda me dëshmitarët e rremë ishte e simuluar. Salianji u shpall fajtor për akuzën “kallëzim të rremë” dhe u dënua me një vit burg.
