Ministria e Arsimit dhe Sportit ka shpërndarë mbi 27 mijë e 200 tekste mësimore “Gjuha shqipe dhe Kultura shqiptare” për nxënësit e shkollave dhe klasave të mësimit të gjuhës shqipe në diasporë.
Lajmin e ka bërë të ditur ministrja e Arsimit dhe Sportit, Ogerta Manastirliu përmes një postimi në rrjete sociale, ku theksoi rëndësinë e kësaj nisme si një hap konkret drejt standardizimit të mësimdhënies së gjuhës dhe kulturës shqiptare në diasporë.
“Mbi 27 mijë tekste janë shpërndarë për nxënësit e shkollave dhe klasave të gjuhës shqipe anembanë botës, 70% më shumë se një vit më parë.
Këtë vit kemi gati Nivelin II të tekstit “Gjuha shqipe dhe kultura shqiptare”, tashmë i standardizuar, ndërsa Niveli III për klasat 7-8-9 ka përfunduar dhe do të jetë në duart e nxënësve duke filluar nga viti i ardhshëm shkollor.
Janë rreth 400 shkolla dhe klasa në vende të ndryshme të botës ku mësohet gjuha shqipe dhe kultura shqiptare, duke mbajtur gjallë lidhjen me gjuhën amtare dhe rrënjët tona tek brezat e rinj”, shkruan Manastirliu.
