Në kohën kur vendi ynë prej disa ditësh po regjistron shifra të larta të të infektuarve me COVID-19, duket se Policia e Shtetit ka intensifikuar kontrollet. Autoritetet njoftojnë se gjatë 48 orëve të fundit, janë gjobitur 1435 qytetarë që nuk kishin vendosur maskat mbrojtëse.
Gjithashtu janë gjobitur 352 shtetas që udhëtonin në automjet, me persona që nuk kishin lidhje familjare pa vendosur maskën mbrojtëse, si dhe janë ndëshkuar me pezullim të lejes së drejtimit dhe bllokim mjeti, 73 drejtues mjetesh që qarkullonin pa autorizimin përkatës pas orës 22:00.
Gjatë kontrolleve janë shoqëruar nga efektivët në komisariate, 15 shtetas që nuk kanë pranuar t’i tregojnë punonjësve të Policisë dokumentin e identifikimit. Pasi janë identifikuar ata janë ndëshkuar me gjobë 3.000 lekë dhe janë lënë të lirë.
Policia informon se janë gjobitur me 1.000.000 lekë, 2 administratorë subjektesh që janë konstatuar duke ushtruar aktivitetin në kundërshtim me protokollet e sigurisë. Po ashtu, në të gjithë vendin janë ndëshkuar me masë administrative 10.000 lekë, 49 shtetas që janë konstatuar duke lëvizur në këmbë pas orës 22:00.
Policia rikujton se duke filluar nga dita e enjte, datë 11 shkurt, orari i lejuar i lëvizjes për mjetet e këmbësorët dhe për lokalet do të jetë deri në 20:00.
Të gjithë qytetarët që kanë nevojë për të lëvizur pas këtij orari duhet të pajisen me leje nëpërmjet e-Albania./Opinion.al
