Një shtetas shqiptar dhe një palestinez janë ekstraduar ditën e sotme drejt vendit tonë pasi GJKKO u kishte caktuar masën “arrest në burg” për veprimtari kriminale, të kryera në kuadër të 2 grupeve kriminale.
Interpol Tirana bën të ditur se nga Frankfurti u ekstradua një 33-vjeçar i lindur në Palestinë, i akuzuar si organizator i disa rasteve të dhënies ndihmë emigrantëve, kundrejt 4500-5000 eurove për person, për kalim ilegal në shtetet e BE-së, nga deti dhe nga toka.
Ndërsa, nga Barcelona është ekstraduar një 31-vjeçar shqiptar, i akuzuar për shitje dhe për trafikim të lëndëve narkotike.
Më konkertisht, 33-vjeçarit nga Palestina, Gjykata e Posaçme kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprat penale “Ndihma për kalim të paligjshëm të kufijve”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Ai akuzohet se është organizator i një grupi kriminal, i cili nga viti 2020, ka kryer disa raste të dhënies ndihmë emigrantëve nga Lindja e Mesme, kundrejt pagesave, për kalim të kundërligjshëm në shtetet e BE-së, përmes rrugëve detare dhe atyre tokësore.
Kurse, 31-vjeçarit Gj. Z., lindur në Sukth, GJKKO i ka caktuar masën e sigurisë “Arrest në burg”, për veprat penale “Prodhimi dhe shitja e narkotikëve’’, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Ai akuzohet se ka qenë pjesë e një grupi kriminal që mbante, transportonte, shiste dhe trafikonte lëndë narkotike. Të ekstraduarit iu dorëzuan Drejtorisë së Përgjithshme të Burgjeve për veprime procedurale të mëtejshme.
