Anëtarja e Komisionit të Pavarur të Kualifikimit Etleda Çiftja e cila u akuzua për fshehje pasurie dhe falsifikim dokumenti, është shpallur e pafajshme nga GJKKO.
SPAK kërkonte dënimin me 1 vit burg për Etleda Çiften, të konvertuar në 2 vite Shërbim Prove, të akuzuar për “falsifikim të dokumenteve” dhe për “deklarim të rremë të pasurisë”.
Sipas SPAK, Çiftja ka bërë deklarim të rremë në deklaratat e saj në ILDKP në lidhje me burimin e të ardhurave për blerjen e dy sipërfaqeve trualli. Ndërkohë, nga hetimi ka rezultuar se dy sipërfaqet e truallit Çiftja i ka blerë nga familjarët e saj, me qëllim për të marrë një kredi për blerjen e një apartamenti.
Në një prononcim për mediat pas dhënies së vendimit ajo tha:
“Shumëkush është shprehur se u përpoqën të dëmtonin reformën në drejtësi dhe procesin e Vettingu , por me vendimin e sotëm gjithçka u mësua, që shpresoj që të publikohet i plotë. Të kuptohet qartë se cila ka qenë historia. Që në fillim kam pasur dy kontrolle dhe asnjëherë probleme me pasurinë. SPAK ka bërë punën, ashtu e ka vlerësuar e paraqitur në gjykim dhe dhënia e drejtësisë është nga gjykata”.
