Gjykata ka pranuar kërkesën e ish-ministrit Fatmir Mediu për ta kaluar çështjen “Gërdeci” nga gjykim të shpejtuar në atë të zakonshëm.
Pas seancës, avokati i familjarëve të Gërdecit, Dorian Matlia, foli në një dalje për mediat ku tha se me gjykim të zakonshëm ngjarja zbardhet më mirë.
Sipas tij, ky vendim është edhe në favor të familjarëve të viktimave.
Ai thekson se lëvizja e Mediut ditën e sotme duke kërkuar seancë maratonë, ishte pikërisht për të justifikuar kërkesën për gjykim të zakonshëm.
“Gjykata e pranoi të drejtë kërkesën për gjykim të zakonshëm. Kjo shkon edhe në favor në familjarëve.
Pasi me gjykim të zakonshëm, zbardhet më mirë ngjarja. Procesi do të zgjasë shumë, nuk e di se me çfarë ritmesh do të punojë gjykata.
Fjalën e parë e ka prokurori, i cili do të sjellë listën e provave në seancën e ardhshme, më pas listën do ta sjellë edhe i pandehuri dhe më pas ne do të shohim.
Lëvizja e sotme e Mediut, ishte për të justifikuar kërkesën për gjykim të zakonshëm. Disa persona të listës ka qenë pjesë e procesit, disa të tjerë jo.
Unë besoj se do të ketë një proces të drejtë. Hera e parë që kjo çështje po merr një ngjyresë juridike.
Ne vazhdojmë të jemi me bindjen që aty ka disa fakte penale që jo të gjitha i përshtatet shpërdorimit të detyrës”, tha ai.
