Gjykata e Posaçme kundër Korrupsionit dhe Krimit të Organizuar ka vendosur të lërë në qeli dy bashkëpunëtorët e Rezart Taçit, Bledar Lilo dhe Artur Balla.
Ata akuzohen nga SPAK për pastrim të parave të mafias italiane në shumën prej 18 milion eurosh.
Mësohet se GJKKO ka vendosur të lërë në fuqi masën e dhënë më parë për dy të arrestuarit.
Lilo dhe Balla dyshohen se në bashkëpunim me Taçin janë të përfshirë në skemën e pastrimit të parave. Kujtojmë se Taçi është i shpallur në kërkim ndërkombëtar për të njëjtat akuza.
Sipas SPAK skema e pastrimit të parave drejtohej nga shtetasi italian Francesco Zummo, 90 vjeç dhe I.Z., në bashkëpunim me shtetasin italian Fabio Petruzzella, të shtetasit zviceran me origjinë italiane D.C., të cilët në bashkëpunim me Rezart Taçin pastronin paratë përmes bizneseve në sektorin e naftës.
Francesco Zummo 90-vjeçari nga Palermo, rezulton të jetë një emër i njohur për drejtësinë italiane pasi edhe në të kaluarën ishte dyshuar për implikime në skemën e pastrimit të parave dhe me lidhje të forta me ‘Cosa Nostran’.
Emri i tij bëhet i njohur në mediat italiane në vitin 2001, ku pas një operacioni u sekuestrua pasuri me vlerë rreth 150 mln euro. Dyshohet se personat e implikuar asokohe, mes së cilëve dhe Zummo, pastronin para për mafien e njohur ‘Costra Nostra’. Zummo njihej si një person i afërt i ish-kryebashkiakut mafioz Vito Ciancimino dhe mendohej se ai merrej me pastrimin e parave të tij kriminale, duke depozituar para në shumë banka botërore, si Zvicër, Shqipëri dhe Kanada./Opinion.al
