Diplomati i karrierës, ambasadori Philip Reeker do të zëvendësojë Wess Mitchell si kreu i Byrosë së Çështjeve Evropiane dhe Euroaziatike, duke filluar nga 18 marsi. Reeker, ishte ambasador i SHBA në Maqedoni (sot njihet me emrin: Maqedonia e Veriut) nga viti 2008 deri në 2011 dhe më pas në Departamentin e Shtetit si zëvendës ndihmës sekretar në Byronë e Çështjeve Evropiane dhe Euroaziatike nga 2011 në 2013.
Philip Thomas Reeker (i lindur më 19 janar 1965) është një diplomat amerikan dhe oficer i shërbimit të jashtëm të karrierës në Departamentin e Shtetit. Ai aktualisht shërben në Komandën Europiane të Shteteve të Bashkuara (EUCOM) në Shtutgart, Gjermani, që nga nëntori i vitit 2017.
Më parë ai ishte një Konsull i Përgjithshëm i SHBA-së në Milano, Itali nga data 5 shtator 2014. Ka shërbyer dhe si Zëvendës Ndihmës Sekretar i Shtetit në Byronë e Çështjeve Evropiane dhe Euroaziatike nga viti 2011 deri në vitin 2013.
Nga qershori 2007 deri në qershor 2008, ai shërbeu në Ambasadën e SHBA-së në Irak si Këshilltar i Ambasadorit për Çështjet Publike. Ai ishte Zëvendës Shefi i Misionit në Budapest, Hungari nga 2004 deri në 2007.
Reeker ishte dhe Zëvendës Ndihmës Sekretar në Byronë e Çështjeve Publike nga 2000-2003. Ai mori çmimin Edward R. Murrow për Përsosmëri në Diplomacinë Publike në vitin 2003 dhe udhëtoi brenda dhe jashtë vendit si zëdhënës i Departamentit të Shtetit, duke dhënë opinione dhe intervista për politikën dhe diplomacinë e jashtme të SHBA-së nga viti 2003 deri në vitin 2004.
Pjesë e punës së tij do të jetë dhe Shqipëria, vend i cili është përfshirë në një krizë politike të paprecedentë.
Wess Mitchell, i cili ishte kryediplomati për Europën njoftoi gjatë janarit dorëheqjen. Dorëheqja e Mitchell erdhi në një klimë marrëdhëniesh problematike midis Uashingtonit dhe kryeqyteteve evropiane, që janë tensionuar për shkak të mosmarrëveshjeve rreth tregtisë, shpenzimeve të mbrojtjes dhe tërheqjes amerikane nga marrëveshja bërthamore për Iranin./ G.F Opinion.al
