Socialistët festuan mbrëmë 25-vjetorin në lulishten pas selisë, ku ishin rreth 2 mijë të ftuar. Binte në sy mungesa e ish-kryetarit Fatos Nano dhe deputetit Ben Blushi…po ashtu edhe e Ilir Metës.
Aleati kryesor i PS-së, Meta, nuk ishte prezent, për shkak të vizitës së tij zyrtare në Malin e Zi, por nga LSI ishte prezent vetëm Spartak Braho dhe zv.ministrja e Arsimit, Nora Malaj.
Nuk ishte asnjë nga ministrat e LSI-së, madje as kryetari i Grupit Parlamentar, Vasili dhe ndonjë nga deputetët e kësaj partie edhe pse kanë qenë të ftuar.
Ndërsa Partia Demokratike përfaqësohej nga ish-kryetari i saj, Tritan Shehu.
Në festë ishin aleatët e rinj të PS-së, Shpëtim Idrizi me deputetët e tij Aqif Rakipi dhe Tahir Muhedini. Kreu i Frymës së Re Demokratike, Bamir
Topi, dhe avokat Ngjela ishin gjithashtu në festë.
Të pranishëm dje ishin dhe ish zv. kryetari i parë i PS së, Servet Pëllumbi, por dhe grupi i Nanos Arben Malaj, Ndre Legisi dhe Bardhyl Agasi.
Edi Rama shmangu një shtrëngim duarsh me ish-deputetin e qarkut të Vlorës, Koço Kokëdhima, i cili shoqërohej nga bashkëshortja dhe disa delegatë të kongresit dhe anëtarë të Asamblesë nga ky qark.
Sakaq pas festës, Rama shtroi një darkë në një nga restorantet e Tiranës ku ishin figurat kryesore të partisë.
Ben Blushi dhe Mimoza Hafizi nuk shkuan edhe pse i kishin emrat në listë. Ndërsa Kokëdhima shtroi një darkë paralele ku mblodhi të tijët, mes tyre edhe ishte deputetja e Vlorës, Mira Shehu.
Po nga Vlora, qarku ku Rama është deputet, mungonte në festën e PS kryetari i Bashkisë, Leli.
