Ministri i Energjetikës, Damian Gjiknuri ka reaguar pas akuzave të Berishës për aferë korruptive në tenderin e kaskadës së Drinit. Gjiknuri sqaron favoret e tenderit, por nuk thotë se si arriti të fitojë kompania serbe EFT dhe nuk jep asnjë shifër të vlerës së tenderit. Berisha akuzoi se tenderi është dhënë në terr të plotë informativ, në mënyrë klienteliste për kompaninën EFT.
Në deklaratën e tij, Gjiknuri shprehet se”kontrata për depozitimin e energjisë në kushtet e prurjeve të mëdha, nënshkruar ndërmjet KESH sh.a dhe shoqërisë EFT, të cilës i referohet me dashakeqësi të qëllimshme Berisha, nuk i jep të drejta shoqërisë EFT për të realizuar menaxhimin e kaskadës së Drinit. Kontrata e depozitimit, synon të ofrojë një zgjidhje të problematikës që në vazhdimësi ka rezultuar si pasojë e situatave emergjente dhe të paparashikuara të shkaktuara nga prurjet e mëdha në basenet e HEC-eve të kaskadës mbi lumin Drin, periudha në të cilat shoqëria KESH sh.a. ka qenë e detyruar të kryejë shkarkime uji pa prodhim energjie”.
Me tej, ministri shprehet se “nëpërmjet kësaj kontrate synohet të maksimizohet prodhimi i energjisë elektrike nga Kaskada dhe optimizohet përdorimi i prurjeve për prodhim energjie duke evituar shkarkimet e ujit pa prodhuar energji”.
“Ajo është një ndër masat që i shërbejnë mirëmenaxhimit të sektorit elektro-energjitik dhe maksimalizimit të përfitimeve të shtetit. Çdo person i interesuar, përfshirë edhe mediat janë të ftuar të marrin të gjitha informacionet e nevojshme në Korporatën Elektroenergjitike Shqiptare për procedurat e ndjekura prej saj në këtë rast”, tha ministri Gjiknuri në reagimin e tij.
Në link: çfarë tha Berisha për tenderin
Berisha: Afere korruptive ne tenderin e kaskades se Drinit
