Pas takimit të së martës, Këshilli Politik ka rënë dakord për mënyrën e përzgjedhjes së anëtarëve të ri të KQZ, që dukej se ishte një nga pikat më të forta të kontradiktave mes mazhorancës dhe oppzitës jashtëparlamentare lidhur me Kodin Zgjedhor.
Në përfundim të mbledhjes, përfaqësuesi i PS në këshill, Damian Gjiknuri tha se u gjet dakordësi për të gjitha pikat e mbetura dhe se për 2-3 ditë teksti do të shkojë në kuvend.
“Përfunduam punën për amendimet e Kodit Zgjedhor ku gjetëm dakordësi për të gjitha pikat e mbetura. Plotësuam kërkesat e opozitës, për ato garanci që kanë ekzistuar te ligji aktual, pavarësisht se disa nga standardet e ODHIR kërkonin ndryshime. Për ne është më e rëndësishme që ligji zgjedhor të reflektojë shqetësimet, frikërat apo edhe të kaluarën e afërt të opozitës në mënyrë që të hyjmë në zgjedhje me një ligj të gjithë pranuar.
Nga ana tjetër ekspertët morën detyrë që ta zbardhnin këtë tekst dhe për dy-tre ditë teksti do t’i dërgohet Kuvendit. Kemi rënë dakord që për ligjin e ri zgjedhor që do të implementohet pas zgjedhjeve vendore të radhës që hyjnë në fuqi pasi kalojnë dy palë zgjedhje menduam që të çojmë një pjesë të dytë të legjislacionit shumë shpejt në Kuvend”, tha Gjiknuri./Opinion.al
