Komisioni Qendror i Zgjedhjeve, Prokuroria e Posaçme, si dhe Policia e Shtetit janë mbledhur ditën e sotme në një tryezë të organizatave të shoqërisë civile, lidhur me zgjedhjet e 11 majit.
Prezent në këtë tryezë ishte edhe kreu i KQZ-së, Ilirjan Celibashi, i cili tha se nuk ka ende konkluzione përfundimtare të zgjedhjeve parlamentare të 11 majit.
Pasi sipas tij, Shqipëria ende nuk ka arritur të përmbyllë procesin zgjedhor, pra ta certifikojë atë, për shkak se po shqyrtohen ankimet e ndryshme të paraqitura nga subjektet politike.
“Kolegji zhjedhor vazhdon shqyrtimin gjyqësor e disa prej ankimeve zgjedhore të paraqitura nga subjektet zgjedhore. Akoma nuk e kemi verdiktin e institucioneve përgjegjëse shqiptare mbi këtë proces zgjehdor. Por ky proces zgjedhor, nuk mund të konsiderohet i mbyllur nga pikëpamja formale.
Duke qenë kështu, besoj se është e veshtirë për të gjithë ne të nxjerrim konkluzione të plota e të qarta, mbi atë se cfarë ka shkuar mirë dhe jo mirë me zgjedhjet e 11 majit, e cfarë duhet të përmirësoohet në të ardhmen.
Këtu në Shqipëri, misioni ndërkombëtar i zgjedhjeve, i udhëhequr nga ODIHR, është i pranuar dhe i mirëpritur nga të gjithë aktorët institucionalë dhe politikë. Askush këtu nuk ka konstestuar, e nuk konsteston gjetjet e rekomandimet e këtij misioni.
Kjo është një gjë pozitive, pasi e bën më të lehtë, për të gjithë ne aktorët shqiptarë, institucional dhe politikë për të dhënë gjykime dhe vlerësime të drejta dhe realiste mbi procesin zgjedhor.
Edhe pse, duhet ta themi, jo në pak raste, partitë politike të spektrit të kundërt, kanë lexime të ndryshme të së njëjtës gjetje, apo e të njëjtit rekomandim. Është e rëndësishme që gjetjet e OSBE-ODIHR nuk janë vënë në diskutim”, tha ai.
