Gjermania i bëri thirrje Bashkimit Evropian që të marrë vendim për t’u ndaluar hyrjen në vendet e bllokut personave përgjegjës për shtypjen brutale të protestave antiqeveritare në Iran.
Ministria e Jashtme e Gjermanisë, Annalena Baerbock, u shpreh se ata që rrahin gratë dhe vajzat në rrugë qëndrojnë në anën e gabuar të historisë.
“Ata që rrahin gratë dhe vajzat në rrugë, e ndalojnë në mënyrë arbritrare ata që veçse kërkojnë të jetojnë të lirë duke i dënuar me vdekje, qëndrojnë në anën e gabuar të historisë”, citohet të ketë thënë ministrja e Jashtme gjermane Annalena Baerbock për gazetën ‘Bild am Sonntag’.
“Ne do të bëjmë të mundur që BE-ja t’u ndalojë hyrjen atyre që janë përgjegjës për këtë shtypje brutale e të ngrijë pronat e tyre në BE”, shtoi ajo. “U themi njerëzve në Iran: Ne qëndrojmë dhe mbetemi pranë jush”.
Protestat në Iran kanë hyrë tashmë në javën e katërt të tyre. Ato shpërthyen më 17 shtator, pas vdekjes së 22-vjeçares Mahsa Amini, një vajze kurde, e cila vdiq në paraburgim. Mahsa Amini u arrestua nga e ashtuquajtura policia e moralit, nën dyshimet se kishte shkelur kodet e rrepta islame për veshjen e grave e vajzave.
Të enjten, ligjvënësit e BE-së miratuan një rezolutë ku kërkohej vendosja e sanksioneve kundër përgjegjësve për vdekjen e Mahsa Aminit dhe për shtypjen e dhunshme të protestave.
