Pandemia COVID-19 vijon të përhapet me ritme të shpejta në Gjermani, duke shkaktuar viktima dhe dëme të shumta ekonomike.
Sipas të dhënave të autoriteteve shëndetësore, në total Gjermania ka arritur shifrën e përgjithshme mbi 2 milionë raste me koronavirus, duke u bërë vendi i 10-të në botë që arrin këtë shifër
Një ditë më parë në Gjermani janë raportuar 22368 raste të reja, duke e çuar numrin e përgjithshëm të infeksioneve në 2000958, njoftoi Instituti Robert Koch.
Gjermania gjithashtu raportoi 1113 viktima nga Covid-19, duke rritur numrin e përgjithshëm të vdekjeve në 44994.
Lidhur me situatën e shkaktuar nga pandemia COVID-19, enjten kreu i Institutit Lothar Wieler ka thënë se pavarësisht masave numri i vdekjeve nga koronavirusi në Gjermani është shumë shqetësues.
“Infeksionet e reja të koronavirusit duhet të zvogëlohen masivisht, njësitë e terapisë intensive nuk kanë qenë kurrë aq të rraskapitura si ditët e fundit”, u shpreh ai.
10 nga 16 landet e Gjermanisë tani kanë arritur kapacitetin 85% në njësitë e tyre të kujdesit intensiv, paralajmëroi Wieler, teksa shtoi se bllokimi aktual në vend nuk është aq efektiv sa në pranverë./ Opinion.al
