Gjermania nuk miraton vendosjen e sanksioneve të reja kundër Rusisë. Kështu raporton revista e njohur “Politico”, për sa i përket planeve të Bashkimit Europian për sanksionimin e gazit të lëngshëm rus.
“Berlini është i shqetësuar për zgjerimin e një mase që do t’i detyronte kompanitë e BE-së të sigurojnë që klientët e tyre nuk mund t’i shesin mallrat e sanksionuara në Moskë”, shkruan Politico, duke theksuar se “Gjermania ka frikë se bizneset e saj të vogla do të vuajnë nëse masa do të shtrihet tek produktet për përdorim si kimikatet ose pajisje për përpunimin e metaleve”.
“Dikur, thuhej se duhet të fajësojmë gjithmonë Hungarinë, ndërsa tani është Gjermania që duhet fajësuar”, tha një diplomat i njohur duke folur në kushte anonimati për Politico.
Komisioni Evropian po negocion me kancelarin gjerman për të bindur Berlinin të heqë veton, sipas një prej diplomatëve evropianë, citon Politiko.
Sakaq, një pozicion në lidhje me Rusinë dhe Ukrainën kanë mbajtur edhe Shtetet e Bashkuara të Amerikës. Pas fjalimit ultimativ të liderit të Rusisë, Vladimir Putin, ka qenë Sekretari Amerikan i Mbrojtjes, Llyd Austin i cili ka bërë të qartë se ideja e pranimit të Ukrainës në NATO nuk diskutohet për momentin nëpër korridoret diplomatike botërore. Sipas Austin, Putin është i vetmi person që mund ti japë fund luftës.
“Unë nuk shoh ndonjë dëshirë apo tregues se ne do të ndjekim zgjerimin e NATO-s në ndonjë moment në të ardhmen e afërt”, theksoi Austin gjatë një konference për shtyp.
Linja zyrtare e NATO-s është se Ukraina do t’i bashkohet aleancës një ditë, por jo derisa vendi është në luftë. “E ardhmja e Ukrainës është në NATO”, deklaruan liderët e NATO-s në samitin e vitit të kaluar në Vilnius.
Ndërkohë e ardhmja e Ukrainës pritet të diskutohet në Samitin e Paqes në Zvicër, ku do të jenë të pranishëm mbi 80 shtete. Por, citon, Reuters, pa Kinën, shpresat për izolimin e Moskës mbeten të zbehura.
Po ashtu edhe Lufta në Gaza midis Izraelit dhe Hamasit ka larguar vëmendjen nga Ukraina. Bisedimet pritet të fokusohen tek shqetësimet më të gjera të shkaktuara nga lufta, si siguria ushqimore dhe bërthamore dhe liria e lundrimit, dhe miratimi i një drafti të deklaratës përfundimtare e cila identifikon Rusinë si agresore në konflikt.
