TIRANË- Ministri i Energjetikës dhe Industrisë, Damian Gjiknuri dhe ambasadori gjerman në Tiranë, Helmut Hoffman, nënshkruan marrëveshjen për dhënien e një granti prej 2 milionë euro nga Gjermania, për rimëkëmbjen e sektorit energjetikë në Shqipëri.
“Nënshkruam një marrëveshje te re me Republikën Federale Gjermane, me mbështetjen e bankës KfW, që do të lëvrojë një fond rreth 2 milionë euro për sektorin e shpërndarjes së energjisë elektrike, për rimëkëmbjen e ketij sektori”, tha Gjiknuri.
Bashkë me KfW-në, tha kreu i Energjetikës, jemi duke zhvilluar edhe masterplanin e investimeve të Operatorit të Shpërndarjes së Energjisë Elektrike. “KfË-ja është një nga partnerët kryesorë në sektorin elektroenergjetik. Ka një portofol jashtëzakonisht të rëndësishëm në investime, sidomos në infrastrukturën energjetike.
Ndërsa kryediplomati gjerman, e cilësoi këtë marrëveshje vijimin e angazhimit të Gjermanisë për rimëkëmbjen e sektorit energjetik shqiptar. “Kemi bërë një hap të mëtejshëm përpara në furnizimin e vazhdueshëm me energji në Shqipëri”, tha ai
Më tej, Hoffman tha se pas linjës së tensionit të lartë me Malin e Zi në pranverë përfundon edhe linja e tensionit të lartë me Kosovën.
“Linja 110 kv në jug mendohet të jetë në funksion të plotë në janar. Dy nënstacionet në Himarë dhe Orikum do të jenë gati pas 18 muajsh. Qindra mijëra shqiptarë do mund të furnizohen vazhdueshëm me energji elektrike”, u shpreh ambasadori gjerman.
