Presidenti i Gjermanisë, Frank-Walter Steinmeier i ka kërkuar falje Polonisë, për konfliktin më të përgjakshëm të historisë, gjatë një ceremonie në qytetin Wielun.
“Përulem para viktimave të sulmit në Wielun. Përulem para viktimave polake të tiranisë gjermane dhe kërkoj falje nga ju”, tha Steinmeier, teksa iu drejtua të pranishmëve në gjuhën gjermane dhe atë polake.
Steinmeier foli përkrah homologut të tij polak, Andrezej Duda, i cili denoncoi sulmin e Gjermanisë naziste kundër Polonisë, të cilën e cilësoi si “akt barbar”.
“Ne nuk mund të harrojmë Luftën e Dytë Botërore dhe kur dëshmitarët e asaj ngjarje nuk janë më… në mënyrë që të sigurohemi që ajo që ndodhi në Wielun dhe më vonë edhe në shumë vende të tjera të Polonisë dhe jashtë saj, të mos përsëritet kurrë”, tha Duda.
Kujtojmë se pushtimi i Polonisë nga Gjermania naziste më 1 shtator, 1939, shënoi fillimin e Luftës së Dytë Botërore. Rreth gjashtë milionë polakë, përfshirë tre milionë polakë hebrenj, vdiqën gjatë konfliktit që mori jetën e mbi 50 milionë njerëzish.
Steinmeier dhe krerë të tjerë shtetërorë po marrin pjesë në cerenomonitë që po mbahen në Poloni, për të shënuar 80-vjetorin e nisjes së Luftës së Dytë Botërore.
Presidenti i Shteteve të Bashkuara, Donald Trump anuloi pjesëmarrjen e tij në këto ceremoni, për shkak të uraganit Dorian, që pritet t’i afrohet Floridës./Opinion.al
