Një ngjarje e rëndë ka ndodhur në Hamburg të Gjermanisë, ku katër punëtorë shqiptarë kanë humbur jetën si pasojë e një aksidenti në punë dhe një tjetër ka mbetur i lënduar rëndë.
Mediat gjermane shkruajnë se ngjarja ka ndodhur ditën e martë rreth orës 7:30 të mëngjesit, në zonën e HafenCity, ku shqiptarët po punonin në një pallat. Media gjermane BILD raporton se një prej viktimave nuk është nxjerrë dot ende nga rrënojat.
Raportohet se skela në të cilën ata punonin u shemb nga kati i 8-të në një bosht ashensori, duke marrë me vete të paktën katër punëtorë, të cilët humbën jetën.
Fillimisht doli lajmi se viktimat ishin bullgarë, por më vonë autoritetet njoftuan se bëhej fjalë për shqiptarë. Hetuesit vazhdojnë punën për të zbuluar rrethanat e kësaj ngjarje.
Sipas asaj që shkruan BILD dyshohet se skela nuk është vendosur siç duhet. Të njëjtat burime thonë se aty ishin vendosur rreth 80 blloqe betoni megjithatë është e paqartë se si kjo mund të ketë ndikuar në aksident.
Një përfaqësues i kompanisë që preferoi të qëndronte anonim shkruan se:
“Në këto orë të vështira, mendimet tona janë kryesisht me viktimat, familjet e tyre dhe të gjithë ata që punojnë në kantier. Ekipi ynë lokal ofron mbështetje për punonjësit e shpëtimit në terren dhe bashkëpunon ngushtë me autoritetet përgjegjëse. Ne kërkojmë mirëkuptimin tuaj se ne nuk mund t’ju ofrojmë asnjë informacion të mëtejshëm në këtë moment.“/Opinion.al
