Ambasada gjermane kishte organizuar sot një aktivitet me rastin e Ditës së Bashkimit të Gjermanisë. Në këtë aktivitet ishin të ftuar krerët më të lartë të institucioneve në vend, përfshi kryeministrin Rama dhe Presidentin Meta.
Protokolli kishte parashikuar që në krah të presidentit të ulej kreu i Kuvendi, Gramoz Ruçi, ndërsa një rresht pas tyre ndodhej kryeministri Rama.
Meta reagoi me anë të një postimi në Facebook për këtë aktivitet
“Kënaqësi të merrja pjesë sot në pritjen e organizuar nga Ambasada Gjermane në Tiranë, me rastin e 3 tetorit, Ditës së Bashkimit të Gjermanisë dhe t’i shprehja ambasadorit Peter Zingraf urimet më të ngrohta e të përzemërta për popullin mik gjerman.
Shqipëria do vijojë të mbështetet fort në Gjermaninë mike dhe partnere strategjike.
Mirënjohje të thellë për kontributin e çmuar, të gjithanshëm dhe të përhershëm që Gjermania i ka dhënë Shqipërisë në procesin e integrimit europian, konsolidimin e shtetit të së drejtës dhe reformave demokratike!” shkruan Meta.
Ajo që bie në sy është se në fotot e publikuara nga Meta gjatë ceremonisë ai ka lënë jashtë objektivit kryeministrin por jo kreun e Kuvendit. /Opinion.al
