Një tunel me drogë është gjetur nga policia në Sarandë mbrëmjen e së enjtes. Plot 657 kg kanabis sativa u sekuestruan ndërsa 1 person ra në pranga. Policia tha se aty punonin 7 gra të cilat po procedohen në gjendje të lirë. Nuk dihet ende kush është pronari dhe si funksionte grupi që përpunonte drogën në tunel. Ajo që mësohet në rrugë zyrtare është se një 20 vjeçar është arrestuar, teksa tentoi ti largohej policisë. Gentian Muhollari, 20 vjeç, banues në fshatin Metoq, Sarandë akuzohet për prodhim dhe shitje të lëndëve narkotike. Në kërkim është shpallur L.O., 27 vjeç, banues në Sarandë. Ndërsa 7 gratë që u gjeten duke pastruar dhe paketuar drogën po hetohen të lira.
Njoftimi i policisë:
Policia ka bërë kapjen në flagrancë të Gentian Muhollarit i cili tentoi të largohej me vrap, në fshatin Metoq të Sarandës, pranë një tuneli të braktisur (pa pronarë), në të cilin përpunohej dhe mbahej e fshehur lënda narkotike, e dyshuar si Cannabis Sattiva. Gjatë kontrollit të vendit të ngjarjes, u gjet dhe u sekuestrua në cilësinë e provës materiale:
– 41 kg e 850 gramë, lëndë narkotike e dyshuar si Cannabis Sattiva, në formë boçesh.
– 423 kg degë bime me gjethe dhe boçe, e dyshuar si Cannabis Sattiva.
– 192 kg e 95 gramë, degë dhe gjethe në formë byku.
