Është gjetur trupi i 31-vjeçarit Eraldo Nevruzi, recepsionisti i cili u vra nga bashkëpronari i një hoteli në Dhërmi, Gerald Shehu.
Trupi i 31-vjeçarit është gjetur afër një guroreje pa shkuar në Vuno. Trupi i Eraldo Nevruzit u gjet pasi autori i vrasjes ka treguar gjatë marrjes në pyetje nga policia greke, vendin se ku e kishte hedhur.
Shehu u ndihmua për të larguar trupin nga vendi i ngjarjes nga dy punonjës të tjetër të hotelit, Daniel Qose dhe David Larti. Tre personat e përfshirë në ngjarjen e rëndë janë arrestuar nga Policia.
Autori i dyshuar, i cili u arrestua në aeroportin e Korfuzit në tentativë për t’u arrastisur në Angli, ende nuk është marrë në pyetje pasi s’ka mbërritur akoma në Shqipëri.
Dyshohet se 31-vjeçari është qëlluar për vdekje nga Gerald Shehu dhe më pas trupi i tij është mbështjellë nga tre personat duke e nxjerrë jashtë ambienteve të hotelit. Po hetohet nëse ka bashkëpunëtorë të tjerë në këtë ngjarje të rëndë.
Daniel Qose dhe David Larti kanë thënë në polici se ishin detyruar nga pronari për ta ndihmuar. Ata kanë treguar se pas mesnatës së të mërkurës, pronari Geraldi dhe Eraldo kanë pasur konflikt tek shkallët dhe më pas e ka qëlluar 2 herë me pistoletë. Në orën 04:00 të mëngjesit të së enjtes (6 qershor) Shehu është larguar për në banesë ka marrë çantën dhe është larguar për në Greqi përmes Qafë Botit.
Mësohet se ka ndjekur itenerarin nga Himara- Kuç- Tepelenë – Delvinë- Sarandë deri në Qafë Botë ku ka kaluar kufirin.
Ndërkohë, gjatë kontrolleve që janë ushtruar në banesën e autorit Gerald Shehu, policia ka gjetur një gëzhojë. Dyshohet se kjo është gëzhoja e plumbit me të cilin ka qëlluar në kokë recepsionistin Nevruzi.
