Një ngjarje e rëndë ka tronditur Italinë. Një 30-vjeçar vrau partneren e tij shtatzënë, ndërsa mediat italiane bëjnë me dije se trupi i të resë ishte zhdukur që prej fundjavës.
Ngjarja e rëndë u zbulua pas rrëfimit të të fejuarit, Alessandro Impagnatiello, i cili gjatë orëve të natës të së mërkurës pranoi vrasjen duke thënë: “E vrara unë”. Trupi i 29-vjeçares, Giulia Tramontano, shtatë muajshe shtatzënë, është gjetur në një ndërtesë të vjetër në rrugën Monte Rosa.
Zbulimi i tradhtisë
30-vjeçari kishte një lidhje tjetër dhe Giulia e kishte zbuluar këtë pikërisht të shtunën, pak orë përpara se të zhdukej. Ajo i kishte treguar gjithçka motrës, nënës dhe një shoqeje. “Jam e trazuar, po shkoj të fle”, kishte qenë mesazhi i fundit që kishte dërguar, më pas nuk ishte përgjigjur më në telefon.
Takim sqarues
Të tre mësohet se kishin pasur edhe një takim. Aty Giulia kishte mësuar jo vetëm për tradhtinë, por edhe për faktin se edhe vajza tjetër kishte mbetur shtatzënë, por e kishte abortuar.
Fillimisht, familja e saj mendoi se 29-vjeçarja mund të ishte larguar për shkak të tronditjes pas zbulimit të tradhtisë, por shqetësimi u rrit pasi koha po kalonte.
Hetimet
Karabinierët e Senago, Rho dhe njësia hetimore e Milanos nisën punën pa ndërprerje që prej pasdites të së dielës. Prokurorja Alessia Menegazzo e mbushi dosjen e zhdukjes me hetime, regjistrime telefonike, urdhra për sekuestrimin e kamerave, PC-ve dhe celularëve.
Kërkimet me helikopterë
Giulia u kërkua me helikopterë dhe zjarrfikësit skanuan rrjedhën rrotulluese të lumit Seveso dhe kanalin Villoresi. Trupi u gjet përfundimisht në një ndërtesë që strehon disa garazhe në via Monte Rosa. Ishte i fejuari i saj që zbuloi vendndodhjen pasi u rrëfye përpara oficerëve të policisë.
