Mbeten tragjike zhvillimet në operacionin e kërkim-shpëtimit në anijen e djegur në Korfuz. Një nga 11 pasagjerët e zhdukur të Euroferry Olympia është gjetur i vdekur.
Trupi i burrit u gjet në kuvertën e dytë të anijes, brenda kamionit të tij.
Sipas informacioneve ai ka djegie të jashtme, por dyshohet se ka shumë të ngjarë që vdekja e tij të jetë shkaktuar nga tymi.
Vazhdon operacioni për gjetjen e 10 personave të tjerë të zhdukur. Shpresat u ringjallën nga shpëtimi i shoferit 21-vjeçar të kamionit të dielën në mëngjes, pas dy ditësh e gjysmë.
Ai dyshohet se u ka thënë shpëtimtarëve se “ka dëgjuar zëra të tjerë”, ndërkohë që në të njëjtën kohë burime të Rojes Bregdetare dhe grupeve të shpëtimit të cituar nga SKAI, vlerësojnë se do të gjenden të tjerë të zhdukur.
“Ne jemi optimistë se mund të gjejmë të tjerë dhe kjo është arsyeja pse ne po vazhdojmë operacionin,” tha zëdhënësi i rojes bregdetare, George Alexiou.
Deklaratat e para të shoferit 21-vjeçar
“Më thuaj që jam gjallë.” Këto ishin fjalët e para të shoferit të kamionit 21-vjeçar, i cili u shpëtua mëngjesin e së dielës nga anija e djegur “Euroferry Olympia”, pas dy ditësh e gjysmë.
21-vjeçari është transportuar në gjendje shoku në Spitalin e Përgjithshëm të Korfuzit për t’i dhënë ndihmën e parë dhe për t’iu nënshtruar ekzaminimeve.
Sipas shefit të Spitalit të Përgjithshëm të Korfuzit, Leonidas Roubatis, “21-vjeçari ka vetëm shenja dehidrimi, ndërkohë që të gjitha ekzaminimet janë bërë”.
“Nga informacionet e para me mjekët, ai tha se dëgjoi zëra të tjerë.” Shpresojmë që të ketë njerëz të tjerë të gjallë dhe në gjendje të mirë shëndetësore”, tha zoti Roubatis./Opinion.al
